II CICLO DE NOVOS INTÉRPRETES

A Aula de Música da Vicerreitoría de Cultura e Comunicación da Universidade da Coruña, nun afán de promocionar as novas xeracións de músicos emerxentes nos nosos campus, preparou con moita ilusión o II Ciclo de Novos Intérpretes. Nel preséntanse diversos grupos de cámara formados por alumnos de Ensino Superior de Música en Galicia (conservatorios da Coruña e Vigo, Escola de Altos Estudos Musicais de Santiago de Compostela), un guitarrista de ampla formación, un dúo de soprano e barítono, un cuarteto non “clásico” e a Orquestra de Cámara da UDC, un grupo heteroxéneo formado por alumnos e ex-alumnos dos centros de ensino superior da cidade, persoal laboral da universidade e a necesaria achega didáctica e musical dalgúns músicos profesionais. Con todos eles configurouse un ciclo que naceu no curso pasado cunha aposta clara pola continuidade e coa confianza cifrada nunha etapa, cremos, de apertura a novas descubertas, a novas esperanzas de conectar a Música (si, en maiúscula) e a universidade. A resposta queda na asistencia de público novo, se cadra amigos e compañeiros de estudos dos nosos intérpretes. Queremos apostar pola calidade musical, mais tamén pola formación dese público novo. Tan só cómpre que asistades con respecto e actitude positiva aos concertos; facémolo principalmente para vós. Non é necesario vir vestidos de etiqueta, senón gozar do que vos ofrecen uns músicos que dedican moitas horas de traballo a prepararen algo efémero como é un concerto, mais coa intención de deixaren fonda pegada nos vosos ouvidos e os vosos corazóns e, se cadra, co desexo de que vos quede a intención de repetirdes a experiencia.

Julián Jesús Pérez Fernández

Director da Aula de Música

Vicerreitoría de Cultura e Comunicación

A Orquestra de Cámara da UDC clausurou o II Ciclo de Novos Intérpretes cun concerto celebrado o 4 de xuño de 2008 na Igrexa da Venerable Orde Terceira. Un ano máis contou coa coa colaboración de César Concheiro, frautista e profesor no Conservatorio Superior de Música.

PROGRAMA

I

T. ALBINONI / R. GIAZOTTO (1671-1751)
Adagio en sol menor para cordas

Órgano: Irina Moriatova
Violín solista : Víctor Raúl Cardoso Rada

J.S. BACH (1685-1750)

Suite Orquestral Nº. 2 BWV 1067

II

A. VIVALDI (1678-1741)
Concerto para frauta « Il gardellino » en re maior
Frauta solista: César Concheiro
J.C. BACH (1735-1782)
« Adagio » do concerto para violonchelo en do menor
Violonchelo solista: Valeri Moriatov

M. del ADALID (1826-1881)
Sérénade pour instruments á cordes

J. RODRIGO (1901-1999)
Cançoneta
Violín solista: Víctor Raúl Cardoso Rada

Orquestra de Cámara da Universidade da Coruña
Director: Julián Jesús Pérez